Жамиятнинг устав капитали 200 000 000 (икки юз миллион) сўмни ташкил қилади. У ҳар бирининг номинал қиймати 5000 (беш минг) сўм бўлган 40 000 (кирк минг) дона оддий акцияларга бўлинган.  Жамият имтиёзли акцияларни чикармаган.

Қўшимча акциялар Жамият томонидан уставда белгиланган эълон қилинган акциялар сони доирасидагина жойлаштирилади.

Жамият устав капиталини ошириш мақсадида жойлаштирилган акцияларига  қўшимча равишда чиқариши мумкин бўлган эълон қилинган акциялари миқдори - номинал қиймати 5 000 сўм бўлган 2 000 000 дона оддий акциялардан иборат.

Қўшимча акцияларни жойлаштириш йўли билан кўпайтириш тўғрисидаги қарорда жойлаштириладиган қўшимча акцияларнинг умумий қиймати, сони, тури, номинал қиймати, жойлаштириш тартиби, усули, муддати, жойлаштириш (акцияларнинг биржа ва уюшган биржадан ташқари бозорига чиқариш) нархи, акциялар учун тўлов тартиби, амалга ошмаган деб топиш улуши ва амалга ошмаган деб топилган тақдирда акциялар учун қабул қилинган тўлов воситаларини қайтариш тартиби белгиланади.

Қўшимча чиқарилган акциялар бозор қийматида, лекин номинал қийматидан кам бўлмаган қийматда жойлаштирилади.

Акцияларни жойлаштириш, шу жумладан, акциядорлар ўртасида жойлаштириш тўғрисида қарор қабул қилишда акцияларни жойлаштириш (қимматли қоғозларнинг биржа бозорига ва уюшган биржадан ташқари бозорига чиқариш) нархи қимматли қоғозлар савдоси ташкилотчиларининг савдо майдончаларида вужудга келаѐтган нархлар конъюнктурасидан келиб чиққан ҳолда белгиланади. Жамиятнинг қўшимча акцияларига унинг ўз капитали (қўшилган капитал ва тақсимланмаган фойда) ҳисобидан, шунингдек ҳақини қўшимча акциялар билан тўлаш тўғрисида қарор қабул қилинган дивидендлар ҳисобидан ҳақ тўланган тақдирда, бундай акцияларни жойлаштириш акцияларининг номинал қиймати бўйича амалга оширилади.

Жамият томонидан акциялар сотиб олингани йўқ.